Myrkrið

Myrkrið verður varla svartara en það er núna, þungt yfir og rigningarsuddi.
Við skruppum suður í morgun og komum til baka núna um kvöldmatarleytið, ljósin frá bílnum virtust bara duga nokkra metra framfyrir bílinn, þvoði þau á N1 í bænum hans Krema áður en haldið var í hinn fagra Borgarfjörð.

Við skruppum á síðustu helgi á Jólatónleika Björgvins og það var bara gaman, hefði gjarnan viljað heyra meira í sumum og minna í öðrum en var vel sáttur, miðaverðið er reyndar alveg úr takt við fjárráð þjóðarinnar en það var húsfylli.

Hvernig ætli það hafi verið hjá þeim sem völdu að fara úr bænum og skoða stjörnurnar og norðurljósin.

Við félagarnir stefnum að því að skreppa uppí Tröllaríki, svona til að eiga notalega stund og kanna hvort ekki sé allt í lagi.
Það er fátt sem er betra en að horfa á himininn þarna, grilla, finna smá il í tánni (litlu) og bara að láta sér líða vel , engin ljósmengun og oft algjör stilla.