2.300 húsbílar á landinu

Frétt af visir.is

Fjöldi hjólhýsa hér á landi hefur nærri fjórfaldast og fjöldi húsbíla hefur rúmlega tvöfaldast á síðustu fimm ár hér á landi. Þetta kemur fram í svari Kristjáns L. Möller samgönguráðherra við fyrirspurn Álfheiðar Ingadóttur, þingmanns Vinstri grænna.

Alls eru næri 16.500 hjólhýsi, tjaldvagnar, húsbílar og fellihýsi í umferð hér á landi. Þar af eru hjólhýsin nærri 2800 en voru rúmlega 700 árið 2003. Enn fremur eru hér rúmlega 10.400 tjaldvagnar og hefur fjölgað um þriðjung á þessum tíma. Húsbílarnir eru um 2.300 en voru 900 árið 2003.

Álfheiður spurði einnig hversu mörg slík tæki hefðu tengst umferðarslysum á síðustu fimm árum og reyndust þau 135. Þar af var eitt banaslys og tvö slys með alvarlegum afleiðingum.

Þá spurði Álfheiður hvort ráðherra teldi þörf á að herða eftirlit með þessum farartækjum og gera þau skoðunarskyld. Í svari ráðherra segir að kerrur undir 750 kílóum séu hvorki skráningar- né skoðunarskyldar. Hins vegar séu tengitæki, svo sem hjólhýsi, tjaldvagnar og fellihýsi, skráningarskyld en ekki skoðunarskyld.

Í ráðuneytinu sé nú unnið að mótun reglna um skráningu og skoðun eftirvagna og tengitækja bifreiða og verður í þeirri vinnu hugað að því að gera þau sem eru yfir 750 kg að þyngd skoðunarskyld.

Nýleg ökutæki skoðuð sjaldnar

Þá segir ráðherra reglur um skoðun ökutækja enn fremur í athugun með tilliti til þess hversu oft skuli færa ökutæki til skoðunar. Hér á landi sé gengið lengra hvað þetta varðar en í nágrannalöndunum. Í þessu sambandi hefur verið rætt um að skoða nýleg ökutæki sjaldnar eða fyrst eftir fjögur ár en síðan á tveggja ára fresti og leggja meiri áherslu á skoðun þeirra sem eldri eru. Hið sama mundi þá gilda um skoðun á hjól- og fellihýsum, tjaldvögnum og kerrum yfir 750 kg.

Steini skrifar.
Þetta kemur fram í svari Kristjáns L. Möller samgönguráðherra.
Alls eru nærri 16.500 hjólhýsi, tjaldvagnar, húsbílar og fellihýsi í umferð hér á landi. Þar af eru hjólhýsin nærri 2800 en voru rúmlega 700 árið 2003. Enn fremur eru hér rúmlega 10.400 tjaldvagnar og hefur fjölgað um þriðjung á þessum tíma. Húsbílarnir eru um 2.300 en voru 900 árið 2003.

Þetta er mikill fjöldi þó ég efast um að það séu 10,400 tjaldvagnar í umferð enn, þó sölutölur á einhverjum árafjölda skili þessari tölu.
Mín tilfinning er að tjaldvögnum hafi fækkað í umferðinni eftir því fellihýsunum hafi fjölgað og maður tali nú ekki um hjólhýsin og húsbílana.

Ég nefndi um daginn á spjallinu að ekki vildi ég vera á ferð og lenda á eftir langri lest húsbíla eða bíla með fellihýsi eða hjólhýsi í drætti, lest sem silaðist á hraða sem er langt fyrir neðan leyfðan hámarkshraða.
Við þurfum að vera tillitsöm við aðra vegfarendur og vera fljót að gefa þeim tækifæri til að komast leiðar sinnar.
Það er oft sem við þessi gerð af ferðamönnum ferðumst saman og það er eins og við séum svo hrædd um að missa af ferðafélögunum að við hreinlega höngum í rassgatinu á næsta bíl og þetta gerir það að verkum að aðrir vegfarendur eru í vandræðum að komast framúr.

Svona akstursmáti skapar pirring hjá ökumönnum og þar með eykst slysahætta að þarflausu.

Verum tillitsöm, verum jákvæð, höfum gott bil á milli bíla, bjóðum framúrakstur þar sem það er hægt með stefnuljósunum.
Svo er bara að brosa og njóta lífsins.
Kveðja
Björn H. 29

Allveg er ég sammála þér Björn með tillitsemina í umferðinni. Minn maður hleypir alltaf fram úr sér með stefnuljósum og fylgist vel með . Hann er farinn að draga svo úr hraðanum með aldrinum svo að það eru allir aðrir sem taka fram úr en ekki við