Eldgos eða Mýrareldar.

Gleðilega páska spjallverjar
Veðrið hefur leikið við okkur Borgfirðinga um helgina en hitastigið hefði mátt vera hærra.
Falleg gluggaveður sagði Steini og það passar vel.
Ekki getum við Ægir karpað mikið um veðrið, nánast sömu tölurnar á báðum svæðunum og smá gola.
Væntanlega hafa margir Borgnesingar vaknað um miðja nótt og farið að gá hvort eldur væri undir hjónarúminu eða annarstaðar í húsunum.
Fyrst þegar ég rumskaði fann ég brunalikt af koddanum en þegar þar var engin eldur tók við viðamikil rannsókn á hvar væri að brenna en engan fann ég eldinn, brunalyktin var mest fyrir utan húsið.
Sofnaði ég fljótlega og í morgun sagði húsmóðirin að hún hefði vaknað og fundið brunalykt og farið að gá hvað væri að gerast, hélt að konur byrjuðu á að vekja karlinn en þessar elskur eru alltaf að verða sjálfstæðari.
Skýringin á lyktinni fannst þegar birti af degi og menn sáu reykjarslæðu sem lá yfir stóru svæði en Hvítárvallabaróninn hafði verið að brenna sinu og lognið var svo mikið að reykurinn og ilmurinn lá lengi yfir Borgarnesi og héldu sumir að Mýrareldar væru aftur farnir að loga, svona til að keppa við túristagosið þarna fyrir austan.
Við þurfum líka að lifa segja sjoppueigendur í Borgarfirði.
kveðja