Skruppum á Fiskidaginn mikla

Sæl veriði... Við skelltum okkur á stað seinasta miðvikudagskvöld og hófum ferðina með því að hitta bandarísk hjón sem Helga kynntist á spjallborði netinu, en þau höfðu komið til landsins á miðvikudaginn og vildu endilega hitta okkur svo þau buðu okkur í mat um kvöldið og sátum við með þeim til að verða ellefu svo það var orðið ansi áliðið þegar við héldum frá Reykavík norður heiðar. Við komum til Akureyrar rúmlega hálf fjögur um nóttina og kunnum ekki við að renna heim að húsi hjá neinum svo við lögðum bara fyrir utan verkstæðið sem ég á í Strandgötunni og sváfum eins og skotin til rúmlega 10 um morguninn. Þá losuðum við okkur við kassastæðu af kertum, sendingu sem við tókum með okkur norður og að því loknu var Eyjafjörðurinn skoðaður.

Viðhaldið var með talsvert innan við 1/4 á olíutanknum og Helga spurði mig hvort ég ætlaði vikilega ekki að taka olíu áður en við færum fram í fjörð. Ég svaraði því til að ég kæmi bara við fram í Vín og tæki olíu þar. Þegar Þangað var komið að aflokinni heimsókn í Jólahúsið kom náttúrulega í ljós að það voru bara engar dælur lengur í Vín. Mér fannst þetta ekkert tiltökumál því það mætti þá altént kaupa olíu í Steinhólaskála í bakaleiðinni. En margt hefur breyst á þessum 10-11 árum síðan ég flutti að norðan. Rekstur Steinhólaskála var semsagt lagður af 1998 um haustið og Kuggi í Vín hætti að selja bensín og olíu fyrir einhverjum árum síðan En allt slapp þetta nú samt. Við fórum semsagt í Sólgarð og skoðuðum Smámunasafnið það og það var alveg magnað. Maður hálf skammaðist sín fyrir allt það sem maður hefur hent í gegnum árin þegar þetta safn var skoðað. Aðstaðan fyrir safnið þarna er mjög flott og fín veitingasala í andyrinu og síðan horfðum við á myndina um Sverri heitinn, en hún er sýnd þarna í sér sal. Skemmtilegt að skoða þetta og skyldustopp ef farið er í fjörðinn.

Við rendum svo í Leyningshóla og eins stálumst við Kolli Siggi til þess að fara inn fyrir girðinguna í Tjarnargerði(sumarbústaðaland Bílstjórafélags Akureyrar og fallegt vatn neðan Leyningshóla)en þar átti ég margar góðar stundir sem krakki og fór reyndar og sýndi Kolla Sigga þetta fyrir 10 árum en þá var hann bara 3ja ára svo það varð að endurtaka leikinn.

Við komum svo á Dalvík seint um kvöldið eftir að hafa heimsótt Villa og Unu vinafólk okkar á Akureyri. Á Dalvík tóku miklir höfðingjar, þau Fríða Magga og Jósep í Ásgarði á móti okkur og hýstu Viðhaldið inná lóð hjá sér um helgina. Þar var dýrðlegt að vera og lánuðu þau okkur meira að segja jeppann sinn til þess að geta transportað Helgu niður í bæ, en Ásgarður er syðsta húsið á Dalvík. Þarna á lóðinni hjá þeim eru alltaf á fiskidaginn fjöldi húsbíla, hjólhýsa og tjaldvagna enda vinamörg hjón. Þetta árið voru þau reyndar í fyrsta skipti ekki með súpukvöld fyrir almenning en Halla vinkona þeirra eldaði alveg ótrúlega góða fiskisúpu fyrir lókal liðið og bar sú súpa reyndar af þeim sem við smökkuðum á fiskisúpurápinu seinna á föstudagskvöldinu.

Hinsvegar er alveg frábært að sjá hvað mikið er lagt í þetta hjá mörgum og voru sumir með harmonikku leikara sem spilaði fyrir súpugesti og svo var Logi Bergmann og co með Örn Árnason, hljómsveitina Hvanndalabræður og fleiri sem spiluðu fyrir gesti. Hinsvegar fannst mér súpan þar lang síst og það er spurning hvort þau hjónin ættu ekki frekar að fækka um einn skemmtikraft og ráða sér frekar vanan kokk á næsta súpudag

Veðrið á kvöldin þarna var alveg yndislegt og ótrúlega vinaleg stemming þarna. Á daginn var að vísu norðlensk hafgola og ekkert of hlý en þurrt og sól. Nú við rifum svo í okkur saltfiskbollur og rækjukokteil og fleira á laugardeginum en nenntum ekkert að vera að hanga í einhverjum röðum til að smakka saltfiskpizzu og borgara og hvaðeina sem í boði var enda hvorugt okkar mikið fyrir langar biðraðir. Um kvöldið var svo bryggjusöngur og síðan ein allra magnaðasta flugeldasýning sem ég hef séð. Svo var þetta náttúrulega alltsaman frekar tafsamt þar sem ég hitti marga sem ég hef ekki séð árum saman svo það fór talsverður tími í spjall og svo framvegis. En semsagt mögnuð helgi.

Á sunnudeginum renndum við svo til Akureyrar, skruppum í Bernaise á Bautann og þaðan austur í Vaglaskóg og vorum þar í algerri steik fram á þriðjudag. Síðan var skroppið í sund á Akureyri, í Brynjuís og síðan haldið heim þar sem Helga þurfti að hitta lækni á miðvikudagsmörgninum. Að vísu renndum við í leiðinni á Krókinn og síðan yfir Þverárfjall svona rétt til þess að geta sagst hafa farið þessa leið. Komum svo heim um áttaleytið á þriðjudagskvöldi sæl og ánægt með vel lukkaða ferð.

Kv. Steini & Helga

Alveg frábært að lesa hvað ferðin var ykkur ánægjuleg, greinilega kunnur fyrir norðan. Alltaf gaman þegar veður er gott og allt gengur upp. Ahhahh fyndið kommentið með Logahjónin, Öfunda þig að hafa fengið Brynjuís,
Mér hefur aldrei tekist það að fá bóndann til að leita að íssjoppunni